要學好英文，就唔好介意他人目光
怕冇面、羞恥嘅心態，往往來自於比較。
Photo by Caleb Woods on Unsplash
人生流流長，相信大家身邊總會遇到一啲好怕冇面嘅人，例如有同事覺得自己本身做開中環白領，寫字樓工，覺得要放棄高薪厚職，放下身段，做開荒牛創業，係一件好冇面嘅事。
Photo by Humphrey Muleba on Unsplash
唔好以為能力低嘅人先會怕冇面，其實叻嘅人都會怕冇面，好多精英更加會怕冇面。
就好似我以前喺大學嗰度讀法律嗰陣咁吖，有啲同學雖然佢哋自己都係Band one名校出身，但係總係覺得自己啲英文比起國際學校出身嘅同學口音唔夠正宗，出嚟做presentation嘅時候都會覺得自己好冇面，英文講得唔夠正，比人哋唔夠高尚、唔夠blue-blooded。
除咗怕冇面之外，仲有一種心態，就係怕自己同其他人唔同。
除咗怕自己因為技不如人，失禮於人前之外，仲有啲人係怕自己同其他人唔同，一突出喺人群之中，感覺就好唔自在。
仲記得我係初中時期，其實中英文成績已經唔錯，但係我仍然覺得自己語文水平有進步嘅空間（邊個冇呢？語文呢啲同任何技術一樣都係craft，永遠唔會有完美），所以我每次搭車返學嘅時候，都會準備定南華早報（SCMP）附錄嘅Young Post（Young Post啲文章活潑過南華早報好多），一邊搭車，一邊睇報紙，仲會攞晒螢光筆出嚟間底重點，車上有好多同學嘅同學，當人哋見到你跟住份報紙好勤力咁喺度睇嘅時候，自不然就會有啲聲音話：
「嘩，你使唔使咁扮嘢啊，搭車都讀書，真係咁勤力咩？」
又或者：
「嘩，你咁勤力？睇吓你下次考唔考到第一先？」
又或者：
「你已經名列前茅啦，仲使乜咁勤力呀，做俾邊個睇先？」
不過我好細個已經明白，把口生係人哋度嘅，人哋講咩都得，最重要係對得住自己，自己想要嘅嘢，就要去爭取，如果其他人嘅說話我都咁介意，咁究竟我係想討好其他人多啲，定係學好英文多啲呢？
有時候，企係個車廂裏面，周圍都係人，我會細細聲讀報紙上面嘅文章出嚟，人哋會覺得我更加奇怪，睇報紙都算啦，仲要讀出嚟，念念有詞成個傻仔咁，但係日復日、六月、年復年，每一日嘅功夫咁樣累積落嚟，我嘅英文就越嚟越進步喇。
Photo by Corey Agopian on Unsplash
中五嗰年，我考完會考主科之後，屋企住新界，但係自己走去油麻地一間夜校/補習學校嗰度練習英文，身邊好多嘅同學，全部都係大人，佢地都係重考嘅學生，身邊甚至有啲係曾經考過會考零分嘅同學，但係呢間補習社好嘅地方，並唔係在於身邊嘅同學水平出色，可以鞭策到我，而係佢比好多機會我練習機會。
同一般嘅X代教育、X皇教育等連鎖式嘅補習社唔同，呢間補習社係日日都有練習環節，俾我哋練習英文，雖然我嘅練習對象，好多時係比我英文程度稍遜，但係我並無因為我身邊嘅同學水平參差，而放棄練習。
相信有好多同學，甚至補習社嘅老師都覺得：
「你水平已經咁高啦，仲邊需要同其他同學練習呢？」
但係我明白，唔係自己英文好，就唔需要同其他人練習討論，反而係因為自己英文好，其他人應該未必跟得上，我更加要練習係討論期間，同能力稍遜嘅同學都能夠順利溝通，同埋練習用簡單嘅生字去解釋艱深嘅概念。
訓練到自己可以同任何人溝通，咁先至係真正嘅能力；而唔係自己英文「好勁」，就不斷用深嘅生字，其他人根本唔明白我講緊咩，咁樣先係叫做勁。
Photo by Brooke Cagle on Unsplash
