你有冇犯呢個錯誤，令你英文學唔好？

仲記唔記得我哋細個BB嗰陣，係點樣學英文㗎？

好簡單，就係聽完爹哋媽咪講「爸爸」、「媽媽」，我哋就跟住講啦。

人類學語言係in general都係學聲音先，將聲音聯繫到影像同其他感官刺激（包括觸覺同嗅覺等），跟住先至學閱讀同埋揸筆寫字嘅。

但係點解我哋大個咗學語言，就覺得唔需要將個句子、一個片語、一個詞語讀出來呢？

有好多同學成日都話，自己講英文嘅時候甩甩咳咳，一啲都唔順暢。

跟住當我嘗試搵出佢地問題癥結嘅時候，都會發現佢哋連朗讀一篇文章出嚟嘅時候，都唔暢順。原來佢哋唔單止喺我口講自己心嘅時候唔順暢，就連順暢咁朗讀一篇文章都未能夠做到。

即係話，英文嘅文法（grammar）規則、讀音（pronunciation）規則、用法（usage）規則，呢啲同學都未內化。

當你要講嘢嘅時候，往往對話嘅速度就係要求你要好快講到一句句子出嚟，即係要求你喺短時間內便將你學過嘅詞語，根據規則去砌返一句人哋能夠明白嘅句子出黎，如果你未將以上嘅規則內化，變成本能反應（second nature），咁你又點會順暢咁講得出一句句子呢？

奉勸各位同學，學一句句子、一個片語、定一個生字，都一定要讀出聲。

就算文字喺你腦海中浮現，或者你腦裡面好多圖畫，但係你唔能夠readily從你腦袋retrieve聲音，你喺好難做到講野流暢架。

當然，當你朗讀句子出黎，如果唔肯定一個字點樣讀，自己又未必拼得啱，咁就要搵個role model去模仿佢了。

中國大陸有個出名嘅英文老師，叫李陽，佢鼓勵學生將學英文當成係學做運動咁學，大聲同有中氣咁將一個字讀出黎，佢之前仲會開好似演唱會一樣咁學習會，啲學生好似信徒咁好投入咁大聲讀英文。

雖然唔係話大家要採取一個咁極端嘅方法，不過呢個方法的確有佢一定嘅道理。

李陽曾經喺風靡中國一時嘅英文老師，後來因為家暴醜聞而聲名狼藉。

由今日開始，講英文當做一種口部運動咁練習啦，練練下，你會發現你把口彷彿會帶領住你嘅腦去講架，咁就唔使諗爆頭都講唔出英文喇！